Wenn du wach weeß, liej`ich niemieh nevven dir un et Bess wöhr, du sööx nirjendwo noh mir. Stell kein Froore, op die et kein Antwoot jitt, ich benn lang ald durch de Düür, wohin weiß ich selver nit. Loss et joot sinn, maach dir keine Kopp, hook mich aff, Kind un verlooß dich dropp, dat ich Rääsch hann: Et hätt einfach keine Zweck, och wenn`t noch su schön woor, jede einz`je Aurenbleck. Et litt nit ahn dir, du kanns nix dofür. Et mäht keine Senn, denk nit jrooß drövver noh, et soll nit sinn. Et ess vorbei, eh dat noch russläuf op Dierquälerei. Et ess vorbei un do blieht et och bei, jläuv mir`t ess besser, mir lossen uns frei. Nur en Kääz brennt un dä Zeddel he, vüür mir mäht mich fäädisch, weil`e mich hypnotisiert, majestätisch, unberührt wie Schnie, jede Spur vun mir dodropp deit dir nur unnühdisch wieh. Un ich sinn dich un ich sehne mich noh dir. Wie du doliss, ich benn völlisch irritiert. Wiesu fällt mir jede Buchstabe su schwer? Wiesu kriej`ich, wat ich denke nit och logisch formuliert? Nä,`t litt nit ahn dir, du kanns nix dofür. Wa`s bloß loss met mir? Herrjott, wieso sinn mir zwei uns passiert? Nur dä Wind weiß – falls dä övverhaup jet weiß – wat dä Jrund dofür ess, dat ich wie en Katz su leis dir dä Schal klau, dä noh all dä Sünde rüsch, un dann affhau, eh du mich doch noch erwischs. Wenn du wach weeß, setz ich ir`ndwo en`nem Zoch, Steve Mc Queen als Papillon, vüür Jeföhle op der Flucht, weil`e Angs hätt, datt`e sich ahn dich jewönnt, weil`e janz jenau weiß, dat du jet Besseres verdeens. Et litt nit ahn dir, du kanns nix dofür, ich benn dat Problem un wenn du ehrlich bess, siehs du dat enn. Et ess vorbei, wenn ich jet hasse, dann Römmeierei. Et ess vorbei. Jläuv mir`t ess besser, mir lossen uns frei
Lyrics provided by LRCLIB
