Triptychon

Vun klein ahn wollte dat Altarbild mohle

Eins wie ne opjeklappte Triptychon

Un zwar met alle Färve vum Rähnboore

Unjefähr de Hälfte hätte schon

Uss Sejeldooch drei Leinwäng

Opjespannt un wieß jrundiert

Dä Hingerjrund vum linke Deil

Ess en Pastelltön coloriert

Dovüür en janze Hääd vun klein Fijure

Die miehßte dovun fröndlich, doch unscharf

Konkreter sinn nur die

Die noh links luhre, schematisch

Wer nur m Schatte blieve darf

Paar dovun op Trömmre un e paar dovun em Wald

Paar dovun sinn Kinder un nur winnje richtig alt

Triptychon, wie ne Comic, Breughel-mäßig, minutiös

Triptychon, jed Detail ahn singer Stell, wo et hinjehööt

Je mieh mer dann noh rääts luhrt

Weet et bunter, un janz ahm Rand

E wieß Huus met nem Krüzz

Dodrinne schwaade schwazze Kääls vum Wunder

Ahm Himmel dunkle Wolke un ne Bletz

Trotz allem Sunnestrahle, su wie se Casper David mohlt

Et weed immer surrealer, wat e eijntlich janit wollt:

Zum Beispill en dä Prozession die Rockband

Die Staffelei me m Botterjupp-Portait

Dä Köter, dä die Frau om Fahrrad ahnbellt

Die jraad dä Bänkelsänger mißversteht

Zwei kleine blonde Junge

Die su usssinn wie hä selvs

Die sinn ihm joot jelunge

Un hä ess stolz op die zwei Kääls

Dä Meddeldeil vum Bild ess widder jrauer un dat

Obwohl Konfetti en Masse flüsch

Wer nöher ranjeht, sieht en dann jenauer:

Dä Pinselquäler, dämm sing Färv verdrüsch

Rootlose Jeseechter, ne Clown als Salzsäul, em Spajat

En Naach janz ohne Leechter, Lilli Marleen, die op ihn waad

Allegorie un Symbole

Hä steiht dovüür wie Dorian Grey

Als wöhr dat Bild sich selvs ahm mohle

Kohm et ihm off vüür, da s vorbei

Sick zwei Johr mohlt e langsam

Vertraut nit mieh nur op sing Glöck

E joot Bild will sing Zick hann

Un dat he weet sieh Meisterstöck